الخميس، 13 مايو 2010

أنا و أخويا والمهندس


رحت أنا و أخويا نبيع الأرض - أخدنا معانا الباشمهندس يقسّم الأرض.

فرد الباشمهندس شريط المساحه, مسك أخويا طرف الشريط - أصل أخويا هو الصغير و أنا أصلي الكبير 
والمهندس يقول لي واخد بالك ياعم الحاج 
أتاري أنا مش واخد بالي خالص من حد 
باصص عليهم وهما بيلفوا في الأرض من بحري لقبلي ومن شرق لغرب
بس برضه مش واخد بالي من حد.
بس ماسك في إيدي حفنتين من طين الأرض 
عمال أشم في الطين 
و أشم .. كأن العطر باريسي معتق قديم
بس آه من أديم الأرض
يسري عطره يملا كل أحاسيس جتتي زي ما كانت تقول جدتي.
خلص أخويا والمهندس قياس الأرض 
جايين خلاص أهما.
قال لي المهندس شوف يا عم الحاج .. 
إحنا هنعمل شارع بطول الأرض
من قبلي لبحري وشارعين تانيين من شرق لغرب
ونقسم القطع للبيع بالشكل ده وهو ده أحسن وضع ....

لقيتني بأقوله : .. شوف إنت يا باشمهندس ومعلهش يا أخويا .. أنا من الآخر كده صعبان عليَّ 
"
بيع الأرض".


محمود عبد الفتاح حويحي
12 / 5 / 2010


هناك 3 تعليقات:

  1. مش عارفه ليه افتكرت مسلسل الناس فى كفر عسكر والتتر بتاعه

    خف في المشي دوسك........علي جدودك تدوس
    الارض وجنة عروسك.......وطي ع الارض بوس
    من طينة الارض عرضك..... فيها بكارة العروس

    ردحذف
  2. كان لازم نقرا ونتمتع مع حويحى الكبير الاصيل ونفك معاه الرمز - الارض - العرض وحبه للحياة وتمسكه بها رغم اى شئ ، الرمز هنا واضح قوى حبه للارض وريحتها ، بيعبر بوضوح عن حبه لهذه البلد للوطن متمثل فى الرائحة المعتقه ، من زمان نسينا رائحة الارض ومنهم لله اللى نسونا وحشوا ادمغتنا بحب بديل لا يودى ولا يجيب .. مفيش شئ فى الدنيا يعادل حب الارض ولا رائحه فى الدنيا تعادل رائحتها الممزوجة بعرق الاهل والاجداد
    ديما اقول الله عليك ياحويحى ياكبير

    ردحذف
  3. انا كمان بيصعب علي بيع الارض
    ولما باعوا بيتنا في البلد علشان يقسموا فلوسه علي ميت وريث ، كل واحد خد 100 جنيه ، وذكرياتنا وتاريخنا اتردم عليه تحت انقاض البيت ، صعب علي البيت ، وزعلت من الورثه اللي باعوا التاريخ بالورق التافهه علشان يشتروا سندوتشين يعملوا ليهم عسر هضم ، انا محترمه مشاعرك وعارفه ان الزمن اللي احنا عايشينه قبيح ، واللي معاه قرش يساوي قرش ، وان القابض علي تاريخه كالقابض علي الجمر ، لكن الحياه ليست الا صعوبات متتاليه نخوضها ونتحملها ونعبر من اوجاعها ونفضل عايشين نحترم نفسنا ...
    يارب ماتبيعيوش الارض ، يارب كلنا مانبعيش التاريخ والجغرافيا ، اعرف صعوبه مااقوله واعرف وجع احساسك ، لكن من قال ان هذه الحياه سهله !!!!!!!

    ردحذف